RSS

‘नाइँ म त्यो घर जान्न,’‘ मालिक्नीले तातो आइरनले दुबै हात, पेट, छाती र खुट्टामा डामेका घरेलु कामदार रहेका १३ वर्षे घनश्यामलाई रुवाउँदै पीडककै घरमा,

06 Jul

काठमाडौं असार २२- ‘नाइँ म त्यो घर जान्न,’ जिल्ला प्रशासन कार्यालयमा ‘दिदी भिनाजु’ले तान्दै गर्दा आकासे रंगको सर्ट र नीलो सुरुवाल लगाएका घनश्याम महतो रुँदै भनिरहेका थिए, ‘मेरो कोही छैन, कसैले हेर्दैन।’
एक प्रहरी अधिकृतको कपनस्थित घरमा घरेलु कामदार रहेका १३ वर्षे घनश्यामलाई गत जेठ १९ गते मालिक्नीले तातो आइरनले डामेकी थिइन्। पैसा चोरेको अभियोग लगाउदै दुबै हात, पेट, छाती र खुट्टामा डामेका खत अझै उनको शरीरमा देखिन्छन्।घटना सार्वजनिक भएपछि बालअधिकार गृहमा राखिदै आएका उनलाई सोमबार जिल्ला प्रशासन कार्यालयको आदेश अनुसार दिदी भिनाजु दाबी गर्नेको जिम्मा लगाइएको थियो।
दिदी भिनाजुले घनश्यामलाई पीडककै घरमा लगेका छन्। आफूले यातना पाएकै घरमा पठाउन लागिएको सुइँको पाएपछि महतोले उनीहरूसँग जान आनाकानी गर्दै रोएका समेत थिए।

जिल्ला प्रशासन कार्यालयबाट रुवाउँदै घनश्यामलाई तानेर लगिँदै। तस्बिरः बद्रीकुमार न्यौपाने

बालअधिकारका पक्षमा काम गर्दै आएको संस्था ‘सिबिस’ले पीडक विरुद्ध जिल्ला प्रशासन कार्यालयमा उजुरी दिएको थियो। प्रहरी निरीक्षक चेतबहादुर पाठकको घरमा घटेको यो घटनामा संलग्न भएको अभियोगमा उनकी पत्नी सुशीलालाई केन्द्रीय कारागारमा पुर्पक्षका निम्ति थुनामा राखिएको छ।
यसबीच अदालतले खोजेको बेलामा बालकलाई उपस्थित गराउने शर्त राख्दै प्रशासनले सिबिस र दिदी भिनाजुबीच मिलापत्र गराएको छ। पीडित महतोलाई तीन दिनभित्र तीन लाख रुपियाँ क्षतिपूर्ति दिन पीडकपक्ष सहमत भएको छ।

जिल्ला प्रशासन कार्यालयमा रुँदै घनश्याम। तस्बिरः बद्रीकुमार न्यौपाने

‘बालकलाई रुवाउँदै पीडककै घरमा पठाउनुले ठीक नियत देखिएन,’ सिविसका कार्यकारी निर्देशक मिलन धरेल भन्छन्।
‘त्यहाँ गएपछि मलाई फेरि पहिलेजस्तै व्यवहार गर्नेछन्,’ जबर्जस्ती पठाउँदै गर्दा घनश्यामले भनेका थिए,’पहिले पनि पिट्दै काममा लगाउँथे।’बच्चालाई घिच्याउँदै पीडकको घरमा लैजादा दिदी भिनाजु बताउनेहरुले आफू भर्खरै काठमाडौं आएको सुनाएका थिए। ‘बस्न मान्यो भने यहीँ राखेर पढाउन लगाउने विचार छ,’ आफूलाई दिदी दाबी गर्नेले भनिरहेकी थिइन्,’मानेन भने गाउँमा लैजान्छौं।’
सिविस पदाधिकारीका अनुसार बाललाई आफन्त भन्दै लिन आउने व्यक्ति आफ्नै दिदी होइनन्। ‘घनश्यामले आफ्ना बुवाको नाम शिवलराम भनेको छ,’ धरेल भन्छन्, ‘जबकि सुनिताको नागरिकतामा बुवाको नाम सत्यनारायण लेखिएको छ। ‘अहिले पनि यो घाउ दुख्छ र चिलाउछ,’ प्रजिअले निर्णय सुनाउनुअघि घनश्यामले आइरनले डामेको खत देखाउँदै नागरिकलाई भनेका थिए।

आइरनले डामिएपछि अस्पतालमा रहेका बेला घाइते घनश्याम। फाइल तस्बिरः बद्रीकुमार न्यौपाने

काठमाडौंका प्रमुख जिल्ला अधिकारी लक्ष्मीप्रसाद ढकालका अनुसार दिदी भिनाजुको जिम्मामा पठाउने आदेश सुनाउने बित्तिकै बच्चा रुन सुरुगरेको थियो। त्यतिबेला के गर्ने भन्ने अन्यौल सिर्जना भएको थियो। ‘बच्चा रुँदैमा हुँदैन, उसलाई हकदार आफन्तको जिम्मामै पठाइनु पर्छ भनेर मैले नै आदेश दिएपछि लगेका थिए,’ प्रजिअ ढकालले भने,’यसरी पठाएको बच्चालाई पीडककै घरमा लगियो वा कता पुर्‍याइयो भन्ने जानकारी मलाई भएन।’

 

जवाफ लेख्नुहोस्

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

 
%d bloggers like this: