ध्रुव दंगाल, सिन्धुपाल्चोक,
वैशाख ४- नवनियुक्त अर्थ राज्यमन्त्री ल्हारक्याल लामाविरुद्ध राष्ट्रियता ‘भारतीय’ उल्लेख गरी भारतको राहदानी लिएकोसहित १० बुँदे आरोप लगाएर ६ वर्षअघि नै गृह मन्त्रालयमा उजुरी परेको खुलेको छ। यथार्थ बुझेर जानकारी दिन गृहले सिन्धुपाल्चोक जिल्ला प्रशासन कार्यालयलाई उतिबेलै गरेको परिपत्र बिनाकारबाही थन्काएर राखेको भेटिएको छ। उजुरीमा राष्ट्रियता, नाम, ठेगाना र उमेर ढाँटेर नेपाल र भारतबाट राहदानी, तिब्बती शरणार्थीको परिचयपत्र लिएको र भ्रष्टाचार गरेको आरोप लगाइएको छ। उजुरीमा दुबै राहदानी र शरणार्थी परिचयपत्रको प्रतिलिपिसमेत छ। उनले सात वर्षअघि परराष्ट्र मन्त्रालयबाट ११२१५८८ नम्बरको राहदानी लिएका थिए। काठमाडौं-६, बौद्धको ठेगानामा उनले मिस्टर वाङचुक रिम्पोछेको नाममा नेपाली राहदानी लिएका छन्।
जन्ममिति सन् १९६७ जुलाइ २९ उल्लेख गरी नेपाली राहदानी लिएको छ वर्षअघि नै उनले खेम्पो छिमे छिरिङ नाममा भारतीय राहदानी लिएको भेटिएको छ। उनले भारतीय नागरिककै हैसियतमा गुवाहाटीबाट राहदानी लिएका थिए। ‘ए’ २१२९८१२ नम्बरको यो राहदानीमा उनको राष्ट्रियता भारतीय, ठेगाना भारत कुलिगल र जन्ममिति सन् १९६५ अक्टुबर १ उल्लेख छ।
राज्यमन्त्री लामाले लिएको भारतीय पासपोर्टको फोटोकपी। फोटो साभारः माइसंसार
उनले सन् १९६९ मा तिब्बती नागरिकको हैसियतमा भारतको मैसुरबाट लामा छिमे छिरिङ नाम राखी शरणार्थी परिचयपत्र लिएका थिए। गुम्बा विकास समितिको अध्यक्ष हुँदा उनले लाजिम्पाटमा बज्रनेट कम्पनी खोलेर आर्थिक हिनामिना गरेको र नभएको ठाउँमा गुम्बा भएको उल्लेख गर्दै भ्रष्टाचार गरेको आरोप उजुरीकर्ताले लगाएका छन्।
बौद्धका फुन्चोक लामा, तेन्डुप लामा र ग्याल्जेन लामाले २०६२ वैशाख ६ गते लामाविरुद्ध गृहमा उजुरी गरेका थिए। सोही वर्ष जेठ १५ गते नै गृहले उजुरीको मिसिलसहित यथार्थ बुझेर जानकारी दिन निर्देशन दिँदै सिन्धुपाल्चोक प्रशासनलाई परिपत्र गरेको थियो।
तत्कालीन शाखा अधिकृत जीतेन्द्रबहादुर खड्काको हस्ताक्षर रहेको पत्रमा ‘ल्हारक्यालकै उपस्थितिमा यथार्थ बुझ्न’ भनिएको थियो। प्रशासन स्रोतका अनुसार उनीसँग सम्पर्क नभएको भन्दै गृहमा जवाफ पठाइएको थियो। उनी सदरमुकाम आएका बेला नबिराई प्रशासन कार्यालय छिर्दै आएका छन्।
उनले कुन जिल्लाबाट नागरिकता लिए भन्ने अझै पुष्टि भएको छैन। जिल्ला प्रशासनको नाबालक नाम दर्ता रेकर्डमा उनको नाम भए पनि सिन्धुपाल्चोकबाट नागरिकता नलिएको पुष्टि भएको छ। २०३४-३५ मा हेलम्बुमै गरिएको नाबालक दर्तामा त्यतिबेला उनको उमेर १२ वर्ष उल्लेख छ। प्रशासनका नायव सुब्बा रमेश घिमिरेका अनुसार त्यतिबेला प्रशासनले नाबालक नाम दर्ता रेकर्डको नाममा रेजा लगाएरमात्र नागरिकता दिने गरेको थियो। उनको नाममा रेजा लगाइएको छैन।